اششش .. الاسرى والمفقودين والشهداء !

وعدت نفسي قبل اوعدكم ان بهذي المدونه راح اكتب كل شي يعني الكويت والكويتيين

بحاله خاصه و اذا في شي يهم امتنا العربيه ولا الاسلاميه ممكن اني اطرق له

على طاري الكويت والكويتيين

إلا شخبار ( مكتب الشهيد ) ؟

وشخبار(  اللجنة الوطنية لشؤون الأسرى والمفقودين ) ؟

مالهم حس ولا "ذجر" على قولتهم

يقولون اطور الامر وصار فيه

 ( جمعية اهالي الشهداء الاسرى والمفقودين )

كنت افكر اقول شنو دورهم الحين ؟ قبل ايام المرحوم الشيخ سالم على الاقل فيه طاري

خبر جنه مو لهم بالجريده .. خبر اسرع سريع بموجز الاخبار

مساء الخير ولا صباح الخير يا كويت فيه طاري بالغلط

الحين مادري من زمان مالهم طاري و حس

قايمين بواجبهم ! مع اني ولا مره سمعت عن امر عظيم قاموا فيه كله اقل من الواجب

ولا نسوا اهالي الاسرى والشهدا

اتوقع اهالي الاسرى والشهدا غاسلين ايدهم بتايد من هالمكتب و هاللجنه

اللي اعرفه ان كل وحده ولا واحد وده يرتاح بشغله وما يبي يشتغل

ويبي الرزه وراتب حلو و دوام خفيف ولا لطيف يستذبح بالواسطات عشان ينتقل

هناك ولا يتوظف هناك .. عموما مو هذا موضوعنا  موضوعنا

ابي اللي عنده خبر ولا يدل لهم درب و طريج

خل يدلوا بدلوه خلونا نشوف وين وصلوا الطيبين باعمالهم الجليله

ابي استفيد ونستفيد بمعلوماتنا هذا هذي المؤسسه الوطنيه العظيمه

لا تحرموني من معلوماتكم ولكم الشكر

عالم خاص !

جميل ان يكون للإنسان عالم
خاص .. يمارس فيه طقوس ما يحب
من اشياء بكل شفافيه و صدق دون ان يكون هناك ضغوطا
خارجيه .. تجبره ان يكون في خطوط مستقيمه لا يحيد عنها
او متعرجه لا يحيد عنها ايضاً .. على نسق سابقيه

حلو ان يكون عندك مدونة تسوي فيها كل اللي تبي
بدون ما احد يجبرك تكتب جذي ولا تكتب جذي
بدون ما يكون هناك جهة رقابيه تجبرك ان تشطب هذا السطر
وتلغي هذي الفكره و تقمع هذا التلميح و تأسر هذه الخاطره
رغم ان البلد يصيح بالديمقراطيه ويتوشح حرية الرأي والفكر
واننا من الدول التي لا تنادي بالحريات ألوان و اشكال

حلو ان يكون عندك مكان .. تعيش فيه لحظات .. احلامك الخاصه
امانيك و امبراطوريتك اللي انت فيها طبعاً الامبراطور او الحاكم
مو شرط مدينه فاضله بس فيها كل ما تحب و تشتهي نفسك

حلو ان يكون عندك اماني على هذه الشكيله .. و تحققها للحظات بعيد
عن ارض الواقع رغم انها ممكنه بأرض الواقع ..
 بس ماتدري وين نقاط الضعف او القوه
ماتدري وين اهيا بالضبط التهديدات هل اهيا خارجيه او داخليه .. ؟
ليش غير قابله للتحقق هل وصلتها بدائره الخيال الغير محقق او انها
داخل مدى خيال محقق و سيكون بيوم من الايام .. هذا كله امر بيدك

اللي ودي فيه ان كل شخص يدخل هني يشاركني ..
المكان او الحلم او شطحه الخيال هذي
سواء شي محقق ولا غير محقق ..
خلونا .. ناخذ راحه الواقع لحظات .. نتشارك فيها احلام و اماني
ونرسم ابتسامه مشتركه

البدايه , مع الحب

منذ زمن و انا متابعه جيدة لعالم المدونات و المدونين .........

الجميع عامه و المدونات الكويتيه والخليجية خاصة

ليست عنصرية انما لتقارب البيئه .. الهموم و الافراح الواحده

او الشبه واحده ، سعيده و حزينه في نفس الوقت

قارئه و متابعه جيده الا انني لم تتولد لدي رغبة المشاركه والتعليق و الرد

احببت هذا الوعي البائن الذي ولد في قلوب الشباب

الوعي السياسي والاجتماعي و العاطفي ايضاً ، سعيدة جدا انه قد تكون لدينا في الوطن العربي

عامة و الكويت خاصه قاعده تقرأ و تكتب في تلك المواضيع السياسيه و الاقتصادية و التربويه والاجتماعيه

والدينيه و جميع الميادين ، مجموعة مثقفه  رغم اني اعمل بعض التحفظات الى افكار و قناعات البعض

الا انني احببت تلك الحرية في التعبير و التفكير لا حرمناها ابدا

جاء اليوم الذي شعرت بالرغبه الموقوته تلك التي تفجرت بين اضلعي راغبه في ان اشارك الجميع حروفي

افكاري نبضاتي و مشاعري و حبي لهذا الوطن و اعلم ان الحب محله القلب و لايعني ظهوره حروف او اخفاءه

في طيات النبض هو ان حبي في ازدياد او نقصان او دلاله ولاء او وفاء ، لكني آثرت المشاركه لربما

هنا ستطيع تعزيز قناعاتي في امور و تغير قناعاتي في امور لربما اخطأت فيها او حالت الظروف و السنون

 في ان اصيب في اعتناقها يوماً

وقفت صامته امام المدونه الرضيعة هذه في اختيار اسماً يليق بما احمل من براكين الكلمات والحروف

بما احمل من سعار الحب و سعار الشوق

بما احمل من جروح آن لها ان تندمل و تشفى

من افكار ان لي ان اطلق حرياتها واعتقها من العبوديه

من ومن ومن ومن !

حرت فيما ابدأ ,. الى اين و الى متى

واين هي البدايه و ماهو خياري و خط سيري الذي لا تعثر به ولا الم

ووجدت جميع الدروب تحمل في بداياتها الكويت ونهاياتها الكويت

ومنها البدء واليها المنتهى .. لذا حملت اركابي ..قلمي حرفي وقلبي

وخضت دربا فيه الكويت من كل جانب توغلت قلب الكويت

عانقت الروح من الروح و بدأت

لكم مني الحب لكم مني الوفاء لكم مني الصدق

وللكويت مني كل شيء

...
غيوره على الكويت ولا شيء سواها